[东方报]世界盃：大勝後信心滿瀉 德國半場發難捉大象[06-20]

                               
登录/注册后可看大图

今晚世盃E組次輪焦點戰，德國要硬撼科特迪瓦。德國各項賽事已豪取10連勝，包括首輪狂數新丁庫拉索7比1，信心爆晒棚，而且初段例搶韁，對住實力分子「大象兵團」，必定想先發制人，半場主勝有計。（Now 618及616周日凌晨4時直播）

德國弗到漏油，各項賽事連贏10場之餘，更狂轟35粒，其中喺E組首輪即大炒庫拉索7比1，7個入波由6名球員取得，進攻點分得好散，無論係逐漸上力嘅箭頭夏維斯、後備殺手丹尼斯烏達夫，抑或中場菲歷斯尼美查定中堅尼高舒洛達碧克嘅後排攻擊，都令對手難於防範。為免夜長夢多，德國梗係想食住個勢贏埋今仗，盡早鎖定出線資格，佢哋近4仗3次半場領先，可見初段零舍搶韁。

科特迪瓦防線唔穩陣
另邊廂，非洲勁旅科特迪瓦亦絕非善類，各項賽事已經取得5連勝，包括熱身賽擊敗蘇格蘭同法國兩支歐洲兵，首輪亦靠阿密特迪亞路末段建奇功，險勝厄瓜多爾1比0，但如果有睇場波嘅球迷都會見到，厄瓜多爾全場3度中楣中柱，搞到「大象兵團」後防風聲鶴唳，最終贏波幸運成分居多，唔好睇得佢哋咁高。

由於德國經常喺世盃分組賽次輪甩轆，例如1994、1998、2002、2010、2014及2022年世盃都贏唔到，加上之前兩屆分組賽出局嘅教訓，今遇科特迪瓦唔敢輕敵，既然佢哋習慣搶開局，半場主勝值得捧場。