[东方报]世界盃：挪威英格蘭Goal手大鬥法[07-11]

                               
登录/注册后可看大图

世盃8強爆發入球激戰，由「魔人」艾寧夏蘭特領軍嘅挪威，火併「三獅兵團」英格蘭！挪威雖然只得夏蘭特單天保至尊，但呢位曼城神鋒入球效率驚人，至於英格蘭亦擁有隊長哈利卡尼同中場祖迪比寧咸「入球雙保險」，而且兩隊後防都唔穩陣，好大機會變成鬥攻格局，2.5球入球大係不二之選。（Viu TV99台、Now 618及616周日清晨5時直播）

挪威可以講係夏蘭特嘅「一人球隊」，除咗分組賽對法國未有披甲，今屆其餘賽事上陣4場，18次射門當中轟入7球，包括上圈16強對巴西梅開二度，係世盃近40年來最高效率射手。

而且夏蘭特征戰英超4個球季已經3奪金靴獎，今場對住英格蘭嗰條英超防線，佢肯定見慣見熟知道對手有幾多斤両，要入波易如反掌。不過，「維京戰士」入球多失球亦多，球隊近5戰入12球但失咗9球，總入球全開3球或以上，踢法極富娛樂性，只係贏定輸比較難估。

至於星光熠熠嘅英格蘭，今屆世盃暫錄5戰4勝1和，陣中兩大主將哈利卡尼同祖迪比寧咸腳風奇順，分別攻入6球及4球，今場對住不擅防守嘅挪威，要入波唔成問題，不過「三獅兵團」防線存在唔少漏洞，32強同16強晉級過程都有失球，包括上仗險勝墨西哥3比2。

迪格蘭賴斯受病毒感染
由於昆沙停賽，列斯占士受傷，加上原本有機會串演右閘嘅迪格蘭賴斯受病毒感染，已經缺席大軍兩課操練，今場上陣成疑，恐怕領隊杜曹今場就算變陣防守，都未必可以頂得住，英格蘭隨時同挪威全力火併，以攻代守，雙方駁火下有機會出現大量入球，中位數2.5球入球大揀得過，進取啲要埋好分頭嘅3.5球大盤亦無不可。